कावासोतीका भूमिहीन दलित र सुकुम्बासीलाई लालपुर्जा वितरण
(नवलपुर)पूर्वी नवलपरासीको कावासोती नगरपालिकामा भूमिहीन दलित र भूमिहीन सुकुम्बासीलाई जग्गाधनी लालपुर्जा वितरण गरिएको छ । कावासोती नगरपालिका वडा नम्बर –४ का भूमिहीन दलित र सुकुम्बासी परिवारका २५ जनालाई लालपुर्जा वितरण गरिएको हो । भूमि समस्या समाधान आयोगले कावासोती नगरपालिका सँग समन्वय गरेर पूर्वा वितरण गरेको आयोगका जिल्ला अध्यक्ष तारापति खरेलले बताए । कावासोती नगरपालिकमा भूमिहीन दलित, भूमिहीन सुकुम्बासी र अव्यवस्थित बसोवासी गरेर ५ हजार ५ सय ९६ जनाले फारम भरेको र क्रमिकरूपमा नियम अनुसार सबैलाई जग्गा धनी पुर्जा वितरण गर्ने कावासोती नगरपालिकाका प्रमुख विष्णु प्रसाद भुसालले बताए ।
वर्षौंदेखि जोतभोग र बसोबास गर्दै आएको जग्गाको लालपुर्जा हातमा परेपछि ढुक्क भएको कावासोती ४ की कल बहादुर परियारले बताए । पुर्जा प्राप्त गरेपछि स्थानीय बासिन्दाहरूले पञ्चेबाजा बजाएर खुसी मनाएका थिए । पुर्जा वितरण कार्यक्रममा पूर्व सङ्घीय सांसद तिलक महत , गण्डकी प्रदेशका पूर्व सांसद विष्णु लामिछाने लगायत राजनीतिक दलका प्रतिनिधिको सहभागिता थियो । जिल्लामा भूमिहीन दलित, भूमिहीन सुकुम्बासी र अव्यवस्थित बसोवासी गरेर करिब ३५ हजारले जग्गा धनी पुर्जाका लागि फारम भरेका छन् ।
