उद्यमी तथा नवलपरासी पश्चिम क्षेत्र नम्बर १ का सांसद विनोद चौधरीले सीपले युवाहरूमा उद्यमशील बनाउन आत्मविश्वास बढाउने बताएका छन् । पछिल्लो समय मुलुकमा युवाहरूले भविष्य नदेखेको भन्दै निराशा फैलाउने काम भैरहेको भन्दै यसलाई चिर्न सीप मूलक शिक्षा र नव उद्यमीहरूलाई काम गर्ने वातावरण बनाउनुपर्ने बताएका हुन् । नबिल बैङ्कको सामाजिक उद्यमशीलता कार्यक्रम नबिल स्कुल अफ सोसल इन्टरप्रेनरसीप कार्यक्रम अन्तर्गत विहीबार बर्दघाटमा उद्यमशीलता तालिममा सहभागी युवाहरूलाई हौसला प्रदान गर्दै सांसद चौधरीले यस्तो बताएका हुन् । जिल्लाको बर्दघाटमा रहेको दिव्यज्योति बहुमुखी क्याम्पसमा दोस्रो चरणको ६ महिना लामो उद्यमशीलता तालिम सञ्चालन गरिएको थियो ।
पहिलो चरणमा सोही क्याम्पसबाट ५० जना युवाहरूले तालिम लिएर उद्यमशीलता सुरु गरिसकेका छन । नबिल बैङ्कको सामाजिक उद्यमशीलता कार्यक्रमले स्थानीय स्तरमा उद्यमशीलताको विकास गर्दै युवाहरूलाई स्वरोजगार बनाउने र सामाजिक समस्या समाधानका लागि उद्यमशीलता तालिम प्रदान गर्दै आइरहेको छ । सांसद चौधरीले बर्दघाटमा नै आर्थिक अभावमा मृगौलाको डायलासिस सेवा सुरु हुन नसकेको भन्दै त्यसका लागि सहयोग गर्रने प्रतिबद्धता ब्यक्त गरेका थिए ।
