पूर्वी नवलपरासीको मध्यबिन्दु नगरपालिका १० अरुणखोलामा रहेको जनता आदर्श माध्यमिक विद्यालयमा आधुनिक प्रविधि सहितको इलाइब्रेरी सहितको कम्प्युटर ल्याब सञ्चालन मा आएको छ । ग्रामीण भेगका विद्यार्थीलाई आधुनिक प्रविधि सहितको प्रयोगात्मक अभ्यासका लागि रोटरी क्लब अफ पोखरा फिस्टेलले अत्याधुनिक प्रविधि तथा सफ्टवेयर जडान गरिएको २० थान कम्प्युटर सहितको ल्याब स्थापना गरिदिएको हो । कम्प्युटर मल्टि नेटवर्किङ सिस्टममा आधारित रहेको, इन्साइक्लोपेडिया लगायत कक्षा ६ देखि १० सम्म सम्पूर्ण पाठ्यक्रममा आधारित कोर्सहरू समावेश रहेको छ । रोटरी क्लब अफ पोखरा फिस्टेलका अध्यक्ष महेश्वर पहारीको अध्यक्षतामा सम्पन्न ल्याब हस्तान्तरण कार्यक्रममा रोटरी डिस्ट्रिक्ट
३२९२ का डिस्ट्रिक्ट गभर्नर इलेक्ट बिनोद कोइरालाले अबको युग विज्ञान र प्रविधिको भएकाले बालबालिकालाई कम्प्युटर प्रविधिको बारेमा विद्यालय तहबाट नै शिक्षा दिनुपर्ने बताए । पहिला जस्तो अक्षरमात्र चिन्नेलाई अबको युगमा साक्षर मानिदैन, अहिलेको साक्षरता भनेको डिजिटल लिटरेसी भएकोले कम्प्युटर प्रयोग गर्न जान्नुपर्नेमा सहभागिले जोड दिएका थिए । २० लाख लागतको ल्याब रोटरी क्लबले स्थापना गरिदिएको विद्यालय व्यवस्थापन समितिका अध्यक्ष मेघराज पान्डेले बताए ।
