हाँस्य सिरियल ‘मेरी बास्सै’मा एकसाथ काम गरेका कलाकारद्धय सिताराम कट्टेल र केदार घिमिरे जब अलग भए, यी दुइविच सम्बन्ध विग्रीएको चर्चा सुरु भयो । यतिसम्म कि, व्यवसायिक रुपमा फाटो आएपछि यी दुई अलग भएको चर्चा भयो ।
यहि वैशाखमा जब, केदार बिरामी भए, विभिन्न खालका अड्कल काटियो । केदारलाई अल्सर र डीप्रेशन भयो । बजारमा सितारामको चर्चा चुलिएपछि केदारलाई डीप्रेशन भएको भनेर चर्चा पनि गरिएको थियो । तर, वुधबार ललितपुरको श्रीकाली चौरमा आयोजित ‘छक्का पन्जा’को पीकनिकमा पुगेका सिताराम र केदार एकसाथ देखिए ।
केदार र सितारामको मित्रता हेर्दा लाग्थ्यो, यी दुइविच मनमुटाव नै भएको थिएन । केदार अर्थात ‘माग्ने बुढा’ले भने-‘मलाई वैशाखदेखि अल्सर र डीप्रेशन भयो । यो लुकाएर राख्ने कुरा नै होइन रहेछ । डीप्रेशन भनेको रोग होइन । कसैमा धेरै र कसैमा कम हुने रहेछ । मलाई सबैभन्दा बढी साउनमा गाह्रो भयो ।’
घर हल्लिएको जस्तो, तर्सिएको जस्तो हुने गरेको केदारको भनाई छ । केदारसँगै रहेका कलाकार सितारामले भने-‘हाम्रो सम्बन्ध विगि्रएको होइन । हामी, व्यवसायिक रुपमा मात्र अलग भएर काम गर्न थालेका हौ । केदारजी बिरामी भएको थाहा पाएपछि, म गिरान्चौरबाट उहाँलाई भेट्न पुगेको थिएँ ।’
केदारलाई आफूले हरेक कुरा शेयर गर्ने सितारामको भनाई छ । व्यवसायिक रुपमा अलग भएपनि व्यक्तिगत रुपमा कहिल्यै मनमुटाव नभएको यी दुइको भनाई छ । सितारामले केदारलाई आफ्नो अभिभावक समेत भनेका छन् ।
तपाइहरु एकसाथ कहिले आउनुहुन्छ भन्ने प्रश्नमा केदारले भने-‘अहिले नेपाल टेलिभिजनलाई नै डीप्रेशन भएको छ । निको भएपछि सोचौला ।’
