रोमेलु लुकाकुले दुई गोल गरेपछि साइप्रसलाई पराजित गर्दै बेल्जियमले सन् २०१८मा हुने विश्वकप फुटबलको छनौट चरणको सुखद सुरुवात गरेको छ । नवनियुक्त प्रशिक्षक रोबर्टो मार्टिनेजको प्रशिक्षणमा पहिलो खेल खेलेको बेल्जियमले साइप्रसमाथि उसकै मैदानमा ३-० को जित निकालेको हो । यान्निक कारास्कोले बेल्जियमका लागि तेस्रो गोल गरेका थिए । बेल्जियम छनौट चरणमा समूह एचको दावेदार टोली हो । युरो २०१६ को क्वाटरफाइनलबाटै बाहिरिएपछि बेल्जियमले प्रशिक्षक परिवर्तन गर्दै रोबर्टो मार्टिनेजलाई भित्र्याएको थियो । मार्टिनेजको प्रशिक्षणमा एभर्टनबाट खेलिसकेका लुकाकुले खेलको १३ औं मिनेटमै हेडरमार्फत गोल गरेका थिए । थोमस मुनिरको प्रहार क्रसबारमा लागेर फर्किएपछि पाएको अवसरमा लुकाकु सफल भएका थिए । दोस्रो गोल ६१औं मिनेटमा संभव भएको थियो । जहाँ कारास्कोले प्रहार गरेको बल साइप्रसका गोलरक्षकले समाउन लाग्दा गल्तीले हावामा उडेको मौका छोपेर लुकाकुले हेडरमार्फत गोल गरे । त्यसको २० मिनेटपछि बेल्जियमका लागि तेस्रो गोल कारास्कोले गरे । इडेन हाजार्डको पासमा त्यस गोल संभव भएको थियो ।