१२ असोज, काठमाडौ । भारतले गरेको अघोषित नाकाबन्दीका कारण उत्पन्न इन्धन संकट टार्न अन्तर्राष्ट्रय विमानहरुलाई मंगलबारदेखि इन्धन नदिइने भएको छ ।
नेपाल आयल निगमले नेपालमा उडान भर्ने अन्तर्राष्ट्रिय विमान कम्पनीहरुले नेपालमा इन्धन अभाव भएको भन्दै बाहिरबाट नै इन्धन भर्न आग्रह गरेको हो ।
आयल निगमको एयरपोर्ट डिपोले इन्धन संकट टार्नका लागि अन्तर्राष्ट्रिय उडानलाई मंगलवारदेखि तेल दिन रोक लगाएको हो । १४ मुलुकका २६ वटा विमान कम्पनीले नेपाल उडान भर्छन् ।
इन्धन नपाएर उडान सेवा नै प्रभावित हुन सक्ने देखिएपछि निगमको एयरपोर्ट डिपोले अन्तर्राष्ट्रिय उडानलाई तेल दिन रोकेको हो ।
अन्तर्राष्ट्रिय उडान भर्ने विमानहरुले बाहिर नै तेल भर्न सक्ने भएकाले इन्धन संकट कम गर्न यस्तो ब्यवस्था गरिएको डिपोले जनाएको छ । उडान सहजताकै लागि यस्तो ब्यवस्था गरिएको निगमको भनाइ छ ।